ကျွန်တော်နှင့် တောတွင်းကာလများ (၈)

ကျွန်တော်တို့မြို့လေး၏ တောင်ဘက်တွင် ပေ ၅၀ ခန့်ကျယ်သော ဗန်းမောက်ချောင်က အနောက်မှ အရှေ့သို့ စီးဆင်းနေပါသည်။ နွေရာသီတွင် ရေအလွန်နည်းပြီး မိုးရာသီ မိုးရွာပြီးချိန်တွင် ရေအတော်ကြီးသည်။ ရေစီးကြမ်းသည်။ တောင်ကျချောင်းလိုဖြစ်နေသည်။ တောင်ကျ ရေနီများက အလိပ်လိုက် အလိပ်လိုက် ချောင်းငယ်ထဲ စီးနေသည်။ ချောင်းရေပြင်ကလည်း ကျယ်လာသည်။ ပေ ၂၀၀ လောက်ဖြစ်လာသည်။ မိုးရွာပြီး ရေတက်စဆိုလျှင် လှိုင်လုံးများကလည်း အလိပ်လိုက် ထလာသည်။ အသံများက တ၀ုန်းဝုန်း။ ရင်ခုန်စရာကောင်းသည်။ ငယ်ငယ်က ထိုလှိုင်းလုံးများကို လိုက်စီးရသည်မှာ ပျော်စရာ။ ချောင်းကြမ်းခင်း တစ်ချို့နေရာများတွင် ကျောက်ဖျာများပေါ်နေသည့် အတွက် လှိုင်းစီးရင်း ကျောနင့်ပွတ်မိ၊ ပေါင်နှင့်ပွတ်မိ ဖြစ်သည်။ ပူခနဲ့။ ထူခနဲ့။ နောက်မှ အရေပြားပွန်းနေတာကို စစ်ကြည့်ရသည်။ နာတာမနာတာ သိပ်သတိမထားမိ။ လှိုင်းစီးကောင်းသည် ကိုသာ သတိထားမိသည်။ ရေကူးတတ်စ ဖြစ်သောကြောင့် တစ်ခါတစ်ခါ ပါးစပ်ထဲ ရေအလုံးလိုက် ၀င်ပြီး မွန်းသွားသည်လည်းရှိသည်။ ရေ၀ဲများအောင် အသက်ရှူမွန်းကြပ်လောက်အောက် ပါသွားသည်လည်းရှိသည်။ ရေချိုးပြီးကြပြီဆိုလျှင် မျက်လုံးများလည်း ရဲရဲနီလျက်။ ကလေးဘ၀၊ တောနေကလေးဘ၀၊ ရုပ်ဝတ္ထုပစ္စည်းများမလို။ ရှိရာပတ်ဝန်းကျင်တွင် ပျော်စရာဖန်တီးပြီး သည်လိုပဲကြီးခဲ့ကြသည်။

စိတ်ရှိလက်ရှိ ပြေစရာလွှားစရာ မြေပြင်ကျယ်ကျယ်ရှိသည်။ လတ်လတ်ဆတ်ဆတ် ရှူစရာ လေသန့်သန့်ရှိသည်။ အားကစားဆိုတာ အထူးတလည်မလို။ အိမ်တွင် ကုပ်ကုပ် အရုပ်လေးတစ်ရုပ်ဖြင့် ချောင်ကုပ်နေရန်မလို။ အန္တရာယ်ကို အန္တရာယ်လို လက်တွေ့နားလည်ခွင့်လည်းရသည်။ ပြေးရင်လွှားရင်း စူးမိသော ဆူးအချောင်းပေါင်းလည်း မရေနိုင်။ လိုက်ရင်း ဆော့ရင်း ခြေချော် ဒူးပြဲသော အကြိမ်းအရေ အတွက်လည်း မနည်းပေ။ ချွေးတဒီးဒီး ဆိုသောစကားကို စာတွေ့မဟုတ် လက်တွေ့လုပ်ပြီး နားလည်ခဲ့သူတွေ။ တောသားဆိုတာ သည်လို ဆိုတာကို ဂုဏ်ယူတတ်သူတွေ။ ပင်ပန်းသလားဆိုတော့။ ဒါ ကစားတာလေ။ ပျော်နေတာလေ။

ချောင်ရေကြီးချိန်တွင် ကျွန်တော်တို့ မြို့အခေါ် "တောင်ပိုင်း" မှ လူများ မြို့သို့ရောက်အောင် မလာနိုင်တော့။ ချောင်းရေ ကျအောင်စောင့်ရသည်။ ကျွန်တော်တို့ မြို့နယ်သည် အတော်ကျယ်သည်။ ထို့ကြောင့် တောင်ပိုင်း၊ အနောက်ဖက်၊ မြောက်ပိုင်း ဆိုပြီး အပိုင်းခွဲထားတာရှိသည်။ ရှမ်းစကားပြောကြတာချင်းပင် လေယူလေသိမ်း နည်းနည်းကွဲသည်။ အနောက်ဖက်ရှမ်းနှင့် မြောက်ဖက်ရှမ်းများ စကားပြောသည်က ပေါ့ပေါ့လေးနှင့် မြန်သည်။ ကျွန်တော်တို့မြို့ပေါ်နှင့် တောင်ပိုင်းပြောသည်က နည်းနည်းနှေးသည်။ ရေကို မြောက်ပိုင်းနှင့် အနောက်ဖက်က "နမ့်" ဟူ အသံထွက်သည်။ တောင်ပိုင်းနှင့် မြို့ပေါ်ကျတော့ "ဒမ်" ဟူသော အသံလို ဖြစ်နေသည်။ တိုက်တိုက်ဆိုင်ဆိုင် ကျွန်တော်တို့မြို့နယ်တွင် "မန်စီ" ဆိုသော ရွာရှိသည်။ တစ်ချိန်က မြို့ဟုပင်ခေါ်နိုင်လောက်အောင် ကြီးသောရွာဖြစ်သည်။ ပင်လုံ ဟူသော ရွာလည်း ရှိသည်။ ထိုနာမည် သိစက "ပင်လုံ" စာချုပ်ကို သွားသတိရမိသေးသည်။ ကျွန်တော်တို့ မြို့နယ်တွင်း၌ "မန်" နှင့်စသော ရွာတော်တော်များသည်။ မန်ပင်၊ မန်ကပ်၊ မန်စီ၊ မန်ဝိန်း စသည်ဖြင့်။